Auðhumla og Mjólkursamsalan eru framúrskarandi fyrirtæki 2024

Auðhumla svf. fékk í gær, 30. október, viðurkenningu Creditinfo sem Framúrskarandi fyrirtæki 2024 og er þetta í fimmta skipti sem samvinnufélagið hlýtur þessa miklu viðurkenningu. Framúrskarandi fyrirtæki eiga það sameiginlegt að vera stöðug fyrirtæki sem byggja rekstur sinn á sterkum stoðum og efla hag allra - en aðeins 2,5% íslenskra fyrirtækja teljast framúrskarandi. Að baki viðurkenningunni liggur bæði mikill undirbúningur og markviss vinna enda eftirsóknarvert að komast í þennan góða hóp íslenskra fyrirtækja.

Til þess að teljast framúrskarandi þurfa fyrirtækin að uppfylla ströng skilyrði sem sett eru fram af Creditinfo og leggur Auðhumlusamstæðan öll mikinn metnað í að standast þær kröfur. Framúrskarandi fyrirtæki þurfa t.a.m. að hafa skilað ársreikningi til RSK á réttum tíma, vera í lánshæfisflokki 1-3, hafa sýnt jákvæðan rekstrarhagnað (EBIT) auk jákvæðrar ársniðurstöðu árin 2021-2023 og eiginfjárhlutfall þarf að lágmarki að hafa verið 20% síðustu tvö ár. Til viðbótar þurfa stærri fyrirtækin að standast ákveðnar kröfur um samfélagslega ábyrgð og sjálfbærni til að vera gjaldgeng á listann.

Mjólkursamsalan, stærsta eign samstæðunnar, hlaut einnig viðurkenningu sem Framúrskarandi fyrirtæki í fimmta sinn og á meðfylgjandi mynd má sjá þá Aðalstein H. Magnússon, sölu- og markaðsstjóra MS og Jóhannes Hr. Símonarson, framkvæmdastjóra Auðhumlu taka á móti viðurkenningunum.

Við þökkum Creditinfo fyrir okkur og óskum öllum fyrirtækjunum sem fengu samskonar viðurkenningu innilega til hamingju með árangurinn.

Til baka