Greiðslur til bænda 10. febrúar 2026

Greiðslur til bænda frá Auðhumlu svf. þann 10. febrúar 2026 geta virst nokkuð óvenjulegar til hluta mjólkurframleiðenda en það skýrist af því að greiðslurnar geta verið samsettar af tveimur liðum eftir því sem tilefni er til. Annars vegar er um að ræða hefðbundið uppgjör á innleggi janúarmánaðar og hins vegar uppgjör vegna útjöfnunar á umframmjólk ársins 2025.

1. Hefðbundið uppgjör janúarmánaðar
Að grunni til eru greiðslurnar nú hefðbundið uppgjör á mjólkurinnleggi janúarmánaðar. Alls var innlögð mjólk janúarmánaðar á landinu öllu 13.333.723 lítrar eða 8,71% af greiðslumarki ársins 2026 sem er 153.000.000 lítrar. Mjólkurframleiðsla ársins 2026 fer sem sagt ljómandi vel af stað.

2. Útjöfnun ársins 2025
Greiðslumark þeirra mjólkurframleiðenda sem ekki nýttu sitt greiðslumark að fullu kemur til útjöfnunar til þeirra mjólkurframleiðenda sem framleiddu umframmjólk á árinu 2025. Þannig koma til útjöfnunar samtals 7.623.808 lítrar á landinu öllu, þar af 7.086.666 lítrar til mjólkurframleiðenda á starfssvæði Auðhumlu svf. Framkvæmd útjöfnunar fer fram samkvæmt 11 gr. reglugerðar 348/2022 (með síðari breytingum) um stuðning í nautgriparækt þar sem segir: „Skal fyrst greitt fyrir fyrsta prótsentustig sem greiðslumarkshafi framleiðir umfram eigið greiðslumark og síðan annað prósentustig og svo áfram eftir því sem ónotað greiðslumark gefur tilefni til“. Af þessari málsgrein leiðir að fyrsta umframmjólkin sem mjólkurframleiðandi leggur inn í afurðastöð kemur fyrst til útjöfnunar. Útjöfnun ársins nemur alls 10,47% sem þýðir að mjólkurframleiðendur sem lögðu inn í afurðastöð allt að 10,47% af mjólk umfram sitt greiðslumark fá það nú greitt fullu afurðastöðvarverði. Alls deilist þessi útjöfnun nú á 276 mjólkurframleiðendur á landinu öllu, samanborið við 263 mjólkurframleiðendur árið 2024. 

Eftir að útjöfnun hefur farið fram stendur eftir sem "raunveruleg" umframmjólk ársins 2025 alls 5.086.726 lítrar á landinu öllu sem 147 mjólkurframleiðendur lögðu inn. Til samanburðar var "raunveruleg" umframmjólk ársins 2024 alls 2.178.618 lítrar sem 70 mjólkurframleiðendur lögðu inn. Um verulega aukningu á umframmjólk er því að ræða á milli ára enda nýtt Íslandsmet sett í innlagðri mjólk í afurðastöðvar á árinu 2025. 

Á þessum tímapunkti liggur útflutningsuppgjör ársins 2025 ekki fyrir og því hefur ekki verið tekin ákvörðun um hvort unnt verði að greiða einhverjar uppbætur ofan á þegar greitt umframmjólkurverð (85 kr/l.).

___________

Því miður fylgja öllum þessum uppgjörum allnokkur pappír. Bókhaldslega er nauðsynlegt fyrir Auðhumlu svf. að kreditfæra áður greiddar greiðslur vegna umframmjólkur sem nú verður keypt sem mjólk innan greiðslumarks vegna útjöfnunarinnar. Uppgjörsgreiðslan frá Auðhumlu svf. vegna útjöfnunarinnar er því munurinn á fullu afurðastöðvarverði þess mánaðar sem áður greidd umframmjólk var lögð inn og því umframmjólkurverði sem greitt var fyrir hana á sínum tíma. Að sjálfsögðu er tekið tillit til efnainnhalds mjólkurinnar.

Afreikningar á janúarmjólkinni sem og uppgjör á útjöfnun sem slíkt fá hefur verið sent til ykkar úr tölvupóstnetfanginu mjolkin@audhumla.is

Því miður reyndist ekki unnt að senda til bænda afurða- og stofnsjóðsmiða ársins 2025 með sama hætti og því voru þeir miðar prentaðir út og sendir til ykkar í umslagi með gamla laginu. Afurða- og stofnsjóðsmiðarnir ættu þar með að berast ykkur í póstkassana á allra næstu dögum.

Til baka